Сiйöс оз вунöдны

Миян странаын медся ыджыд праздник — Победа лун. Аныбсаяс пуктiсны жö ассьыныс пай Победа дорöмö. Сиктысь война кадö дорйыны чужан му мунiс 200 сайö морт, бöрсö эз локны 172-öн. Öнi Аныбын абу нин ловъя ни öти ветеран, но сиктсаяс найöс оз вунöдны. Казьтышта фронтöвик Александр Иванович Казаринов йылысь.

Сiйö чужлiс 1911-öд воын гöль крестьянин семьяын. Ичöтдырыс да том кадыс колисны Аныбын. Мойвиис велöдчыны сöмын нёль класс, сэсся ковмис уджавны. 1933-1935-öд воясын служитiс ар­мияын, сэнi жö велöдчис связистö. Бöр локтic чужан сиктö, колхозын уджалiс бригадирöн. Гöтрасис 1937-öд воын. Война пансигöн гозъялöн вӧлiны нин ныла-пиа. 1941-öд вося июльын Александр Ивановичöс босьтicны война вылö. Фронт вылын веськавлiс чорыд косьясö, куимысь доймылiс. Служитіс связистöн-телефонистöн Гвардейскöй стрелкöвöй полкын Карельскöй, Юго-Западнöй, Мöдöд Украинскöй, Белорусскöй фронтъяс вылын. Мездiс фашистъясысь Украина, Польша, босьтic Берлин.

Аныбö воис 1945-öд вося октябрын. Морöс вылас дзирдалicны куим Гöрд Звезда орден, «За отвагу», «За взятие Берлина», «За победу над Германией в Великой Отечественной войне 1941-1945 гг.» медальяс. Война бöрын уджалiс колхозын бригадирöн, сэсся юралысьöн. Гозъялöн быдмисны вит ныв да кык пи, ставныс лоисны бур йöзöн.

1957-öд вося августын ветеранöс бöрйисны сиктсöвет исполкомса юралысьöн. Тайö сьöкыд удж вылын сiйö вöлi 17 во. Александр Ивановичöс сиктсаяс пыдди пуктiсны. Сiйö вöлi кывкутысь мортöн, сяммис уджавны йöзкöд, бура веськöдлic овмöсöн. Сы дырйи вежсис сиктлöн чужöмбан. Керкаяс эжисны вагонкаöн да мавтiсны краскаöн. 1960-öд воын воссис челядьлы сад. Александр Иванович нуöдiс ыджыд общественнöй удж. Сiйö вöлi коммунистöн эз сӧмын бумага вылын, а збыльысь ловнас висис сикт вöсна.

Ветеран кувсис 1985-öд воын. Сиктын оз вунöдны сiйöс.

Александра МОТОРИНА.

Снимок вылын: A.И. Кaзаринов.

Аныб.

Парма гор, 2012, Май 17 лун.